Nagballaag ti National Disaster Risk Reduction and Management Council (NDRRMC) mainaig ti manamnama a pannakatinnag ti debris ti Long March 7 rocket iti China iti uneg ti maritime zones iti Pilipinas.
Iti memorandum a pinirmaan ni Office of Civil Defense Deputy Administrator for Operations Asec. Cesar Idio, manamnama nga irusat iti China ti nasao a rocket iti nagbaetan ti ita nga aldaw July 15 agingga 17 manipod alas dos agingga alas sais iti bigat, oras iti Pilipinas.
Maibasar iti pakaammo, dagiti posible a panakatinnagan ti rocket debris ket iti 33 nautical miles manipod Bajo de Masinloc, 88 nautical miles manipod Cabra Island, Occidental Mindoro, 51 nautical miles manipod Recto Bank ken 118 nautical miles manipod Busuanga, Palawan.
Nabilin ti Philippine Coast Guard (PCG), Bureau of Fisheries and Aquatic Resources (BFAR), Department of the Interior and Local Government (DILG), ken DENR-NAMRIA a mangipatungpal iti temporaryo a maritime restrictions ken mangiruar ti notice to mariners tapno masalakniban dagiti mangngalap ken dadduma pay a napan iti nasao a lugar.
Naallukoy dagiti Regional Disaster Risk Reduction and Management Council iti Central Luzon ken MIMAROPA a tutokan ken subaybayan ti sitwasyon.
Nagpalagip met ti Philippine Space Agency (PhilSA) iti publiko a saan nga asitgan, garawen wenno iggaman ti aniaman a rocket debris a posible a masarakan ta posible a naglaon iti makasabidong a kemikal a napeggad iti salun-at.
