Mangnamnama ni House Senior Deputy Minority Leader ken Mamamayang Liberal party-list Rep. Leila de Lima nga agbaliw pay ti kapanunotan ni dati a Vice President ken agdama a Naga City Mayor Leni Robredo ken agpaidasig iti 2028 presidential race.
Segun ken ni de Lima, maawatanda no aniaman iti kayat a leppasen ni Mayor Leni idiay Naga ken para iti padana a Bicolanos ngem mangnamnamada nga agbaliw pay iti pangngeddengna ta dakkel iti tyansana a mangabak no yarig iti dadduma a kandidato.
Immunan a nagsarita ni Robredo a saanen nga agpaidasig iti national position inton 2028 ken agpokus laengen iti trabahona kas mayor idiay Naga City.
Innayon ni de Lima a sibubukel iti talekda kenkuana ta ammona a nakasagana latta nga agtignay iti awag ti akemna para idiay Naga ken para iti pagilian.
