VIGAN CITY – Pabor ni dati nga Ilocos Sur Governor Luis Chavit Singson a maipatungpal ti diborsyo ditoy pagilian no la ket adda ti balido a rason.
Iti pannaki-uman ti Bombo Radyo Vigan ken ni Singson, bigbigenna ti nailanad iti Nasantoan a Biblia a saan a nasken a mapagsina dagiti nagkallaysan ngem no narigat ti sasaadenen ti tunggal maysa ken awanen ti namnama pay a masulbar ti parikut iti nagbaetanda ket mabalinda ti agdiborsyo.
Maipalagip a ti Absolute Divorce Bill ket nakapasan iti maikatlo ken maudi a panangibasa ti kongreso, ket no awan ti inayonen ti senado kadagiti probisyon ti gakat, mayendorsonton iti Office of the President.
No met saan a napermaan iti uneg ti tallopulo nga aldaw, aglapse into law wenno otomatikonton nga agbalin a linteg ket mayurayto laengen ti Implementing Rules and Regulations na tapno makita no kasano a maipatungpal ti linteg.
