
Nagsapatan ni dati a Philippine National Police Chief Benjamin Acorda Jr. kas baro nga undersecretary ti Presidential Anti-Organized Crime Commission wenno PAOCC idiay Malakanyang nga inmatangan ni Pres. Ferdinand Marcos Jr.
Ni Acorda ket nagserbi a maika-duapulo ket siam a PNP Chief manipod April 2023 agingga April 2024 ken nagbalin a PNP Director for Intelligence, ken Regional Director ti Police Regional Office X iti Northern Mindanao.
Karaman ni Acorda a nangbukel ti PNP Anti-Cybercrime Group ken nagiggem iti sumagmamano a napateg a posisyon iti biang ti kapulisan.
Sinukatan ni Acorda ni Gilbert Cruz a nagserbi a PAOCC undersecretary idi January 2023.
Ti PAOCC ket naidatag iti salinong ti Executive Order No. 295 idi 2000 ken agakem nga agimbestigar ken mangisayangkat iti operasyon kontra kadagiti sindikato ken korap nga opisyal iti gobierno.