Dead on arrival ti maysa a mayor a napaltugan idiay Dangdangla, Bangued, Abra.
Ti nakapasamakan ti pammaltog ket nasurok kumurang 2.5 km ti kaadayona manipud iti Bangued Municipal Police Station.
Nabigbig ti biktima a ni Jendricks Seares Luna, agtawen iti limapulo ket uppat, agnaed iti nasao a lugar, dati a mayor iti ili ti Lagayan.
Iti imbestigasyon dagiti pannakabagi ti linteg, agtugtugaw ti biktima iti kiosko ti sangwanan ti pagtaenganda, idin dimteng dagiti suspek a naglugan kadagiti dua a motorsiklo a nangpaltug iti biktima iti namin-adu a daras.
Nagsagaba ti biktima iti tama ti paltog ti nadumaduma a paset ti bagina, ken naitaray iti ospital ngem saanen a nakalasat.
Naisayangkat met ti drag net operation para iti panangkemmeg kadagiti suspek.
