Dinutokan ni President Ferdinand Marcos Jr. ni Deputy Ombudsman for Visayas Dante Vargas nga acting ombudsman kagiddan ti manarimaan a selection process para ti kasukat ni Samuel Martires a nagleppas iti terminona idi July 27.
Ti pannakadurok ni Vargas ket kinumpirmaran ti Public Information and Media Relations Bureau iti Ombudsman ket kinunada nga epektibo nga insigida ti panagakemna.
Sinukatan ni Vargas ni special prosecutor Mariflor Punzalan-Castillo a dinutokan ni Marcos kas acting ombudsman idi July 28.
Maipalagip a dinutokan ni dati a president Rodrigo Duterte ni Vargas kas deputy ombudsman iti Visayas idi March 2022.
Iniggaman pay ni Vargas ti posisyon a graft investigation officer II iti Office of the Ombudsman manipod 1988 agingga 1993.
Iti agdama ket manarimaan ti screening ti Judicial and Bar Council kadagiti sangapulo ket pito nga aplikante para iti posisyon iti Ombudsman.
Maisayangkat iti panel interview kadagiti sangapulo ket pito nga aplikante manipod August 28 August 29, September 1 ken 2.
