Napagawid dagiti estudyante ti Malabon National High School kas panagannad iti agwarwaras iti social media a maysa a mensahe a naglaon ti maipagarup a pangta iti seguridad ti pagadalan.
Segun ti gobierno siudad ti Malabon, dagus da a nakibinnulig iti Malabon City Police Station, iti pagadalan, ken dadduma pay a maseknan nga ahensia tapno beripikaen ti impormasion ken masigurado ti kinatalged dagiti estudyante, mangisursuro, ken dagiti opisial.
Awan pay ti opisial a kumpirmasion a mangpaneknek iti kinapudno ti nadakamat a mensahe ngem impaganetget dagiti otoridad a seryoso da a kinita ti aniaman a damag.
Kas paset dagiti addang iti seguridad, agtaltalinaed dagiti operatiba ti Philippine National Police iti uneg ken aglawlaw ti pagadalan bayat nga agtultuloy ti imbestigasion.
