Adda pay iti sabali a personalidad a karaman iti pannakapukaw dagiti sabungero malaksid kadagiti sangapulo ket lima a polis a nakakustodiya iti restrictive custody ti Philippine National Police (PNP).
Segun ken ni PNP Chief Gen. Nicolas Torre III, nabigbigdan ti sumagmamano pay nga indibidual ngem saanda pay laeng nga inaganan bayat nga agtultuloy iti imbestigasyon.
Kinuna ni Torre nga imonmonitorda ti tignay dagiti nasao a personalidad ken nakasagana nga agtignay iti PNP nu kas bilang rummuar ti warrant of arrest kontra kadakuada.
Iti agdama ket agtaltalinaed a nakakustodiya ti PNP iti Camp Crame dagiti sangapulo ket lima a polis a maimimbestigaran pakairamanan ti maysa a Lieutenant Colonel a kangatoan a ranggo iti grupo.
Dagiti sangapulo ket lima ket agpapada nga aktibo a polis malaksid iti maysa a dandanin agretiro ken tallo nga immunan a naikkat iti serbisyo.
Dagiti dadduma kadakuada ket naka-assign kadagiti regional offices idinto a ti dadduma ket manipod iti Area Police Command ken support units.
Iti agdama, agtultuloy iti imbestigasyon dagiti otoridad ti high-profile a kaso a nakainaigan dagiti tallopulo ket uppat a mapukpukaw a sabungero a mapapati a naipan iti Taal Lake.
