Daan a susik ken kinabartek ti rason no apay a binagkong ti maysa a lalaki ti construction worker idiay Barangay Paoa, Vigan City, Ilocos Sur.
Nabigbig ti biktima a ni Jospeh Nuval Arcaparlas, agtawen iti tallopulo ket lima, construction worker, taga-Barangay Ayusan Sur, Vigan City.
Ti met suspek ket ni Ruel Arista Barcellano, agtawen iti uppat a pulo ket pito, taga-Barangay Ayusan Norte, Vigan City.
Tinawagan ti suspek ti biktima ket kinaritna, nagtulagda nga agsarakda iti arko ti Barangay Ayusan Sur, Vigan City para iti panagdinnanog.
Idi makasangpet ti biktima iti nasao a lugar, nakigtot idi nangasot ti suspek iti kutsilyo sa timmaray a mapan iti ayanna.
Timmaray ti biktima ngem nakamatan ti suspek isu a napasamak ti panagginnubal dagiti dua.
Natwang ti biktima ket binagkong daytoy ti suspek iti naminsan a daras iti sakana.
Inanawa met ti kabsat ti biktima a lalaki ti suspek idi lumabas daytoy nga agmanmaneho iti lugar.
Nakalibas ti biktima ken naitarayna ti bagina iti ospital idinto a nakemmeg ti suspek.
Narekobre met ti kutsilyo nga agrukod iti 15 a pulgada iti nakapasamakan ti pammagkong.
