Inpakaammo ti Department of Agriculture (DA) nga aglukatda ti Kadiwa sites kadagiti lugar a nakaro a naapektaran ti Super Typhoon Pepito tapno nalaklaka a makagatang dagiti tattao iti nalaka a nateng.
Segun ken ni DA Assistant Secretary Arnel de Mesa, makikammayetda kadagiti regional ken lokal nga opisyal tapno maisayangkat ti plano.
Innayon pay ni De Mesa a gapu iti agsasaruno a bagyo, agtalinaed a nangato ti presio dagiti nateng, nangruna manipud kadagiti lowland areas.
Dagiti lugar a kaaduan a naapektaran ket ti Ilocos, Cagayan Valley, Cordillera, Central Luzon, Southern Luzon, Calabarzon, ken rehion ti Bicol.
Tapno matulongan dagiti naapektaran a mannalon, nangilatang ti DA iti P541.02 milion para kadagiti agricultural inputs kas iti bukel ti pagay ken nateng, abono, ken dadduma pay nga alikamen.
Adda pay P667 million indemnification fund para kadagiti mannalon nga addaan insurance, P25,000 a pautang para iti tunggal mannalon a mabalin a mabayadan iti uneg ti tallo a tawen nga awan ti interesna, ken pannakaipatulod dagiti truck ti Kadiwa.
