All-set wenno naksaganan ti Civil Service Commission – Region 1 iti maisayangkat a Civil Service Exam –Pen and Paper Test (CSC – PPT) inton August 11, 2024.
Iti pannaki-uman ti Bombo Radyo Vigan ken ni Hedy Jose “Jiggs” Lardizabal a Director iti Civil Service Commission Region 1, ad-adu ita ti manamnama nga ag-exam ta 14,047 ti nagipasa ti aplikasyonna nu kumpara iti 13,435 idi March 3 iti agdama a tawen.
Segun ken ni Lardizabal, iti Ilocos Sur ket maisayangkat ti eksaminasyon para iti Professional ken Sub-Professional iti Ilocos Sur National High School (ISNHS) ket manamnama a 2,340 iti professional level idinto a 217 iti sub-prof.
Nu iti intero a rehiyon ket idiay Lingayen ti kaadoan ta 3,468 iti nagtipon a Professional ken Sub-Prof; idiay San Fernando a 3,369; Urdaneta a 2,934; ken Laoag a 1,719.
Balakadna kadagiti ag-exam a kitaenda ti room assignments tapno ammoda iti papanda ket nasaysayaat nu bisitaenda sakbay ti aldaw ti eksaminasyon tapno saan nga isu ti pakataktakan.
Palagipna a rumbeng a saan a maladaw dagiti examinee ta nainget nga ipapatungpalda ti oras a naituding isu a masapul nga on time da inton exam ket itugot dagiti kasapulan a kas iti ID, black ballpen, alcohol ken face mask (optioanal).
VIDEO – CSC REGIONAL DIRECTOR HEDY JOSE “JIGGS” LARDIZABAL
Inyunay-unayna a tunggal maisayangkat ti exam ket masukatan dagiti saludsud a nakaipalaon isu a saan a patien dagiti aniaman nga agidiaya kadagiti ag-exam a mangipaay ti answer wenno agidiaya ti certificate of eligibility a kasukat ti kuarta ket saan a patien taamangan nu malimlimoda.
Balakadna a nasaysayaat nga agreview, adalen a nalaing dagiti naibaga a review-n, ken agtalek iti kabaelan tapno saan a marigatan iti eksam.
VIDEO – CSC REGIONAL DIRECTOR HEDY JOSE “JIGGS” LARDIZABAL
