Bimmaba pay ti crime rate iti salinong ti administrasyon ni Presidente Ferdinand Marcos Jr iti baet nga adda dagiti nairekord a kidnapping incident no yarig iti naglabas nga administrasyon.
Pinasingkedan ni Presidential Communications Office Usec ken Palace Press Officer Claire Castro a ti parikut iti krimen iti pagilian ket ‘sensationalized’ gapu kadagiti video a nayupload iti social media.
Binalakadan ni Castro ti publiko a saan a mamati kadagiti agwarwaras iti social media platforms ken binallaaganna dagiti agplamplano a mangbutbuteng.
Immunan a pinasingkedan ti Philippine National Police a ti overall crime rate ti pagilian ket bimmaba iti 26.76 percent, ta nairekord ti 3,528 a kaso ti krimen manipud Enero 1 agingga Pebrero 14, nabab-baba ngem iti 4,817 a kaso a nairekord iti isu met laeng a panawen idi napan a tawen.
Innayon pay ti PNP a ti kaso ti kidnapping ket bimmaba idi laeng bulan ti Enero kasaruno ti deklarasyon ti total ban iti Philippine offshore gaming operators.
