VIGAN CITY – Namnamaen ni Mayor Juan Carlo Medina ti panagnegatibo iti resulta iti maikadua a swab testing a dumalanan ti COVID19 patient a masikug ken taga-Pantay Daya, Vigan City nga ita ket naka-quarantine..
Iti pannaki-uman ti Bombo Radyo Vigan kenni Medina, urayenda laengen iti panagnegatibo ti pasyente sakbay a makaawid ta inton June 24 ket malpaston iti panag-quarantine-na.
Pinasingkedan ti mayor a natalged ti kasasaad ti pasyente ken ti sikugna ta kanayon met nga imonitor ida dagiti kameng ti City Health Office.
Malaksid iti dayta, adda ti sangaribo limagasut a pisos ti nailatang para iti tunggal maysa a maigatang kadagiti kasapulanda kabayatan iti pannakai-quarantine da.
Kabayatanna, awan pay laeng ti nabaliwan kadagiti quarantine protocols iti siudad ti Vigan ken dagiti pay laeng dati a pagannurotan ti kasapulan a suroten dagiti umili.
