VIGAN CITY – Kinumpirmaran ni Governor Ryan Luis Singson nga addan iti kaso iti B1117 wenno UK Variant iti Ilocos Sur iti baet ti pananglaban iti covid-19 pandemic iti uneg ti makatawen.
Maibasar iti pakammo ni Governor Singson, idi rabii a naawat iti Provincial Government iti memorandum manipod iti Opisina iti Secretarya iti Department of Health a nangipakammo nga addan iti nasao a variant.
Ti pasyente ket maysa a babai, agtawen ti limapulo ket walo, agnaed idiay Luba, Sta. Lucia, agriculturist nga agtrabtrabaho iti NTA Candon Branch ngem saan a rimuar iti probinsia.
Naamuan laeng nga exposure-na iti maya nga emplyado iti gobierno nga APOR a taga-Rosario, La Union ken agtrabtrabaho iti NTA Candon.
Ti nasao nga APOR ket nagbiahe manipod NCR a nagatendar iti maysa a taripnong ket immay ditoy probinsia nakitaripnong kadagiti agriculturist iti Ilocos Sur ket kalpasan iti taripnong ket immado iti kaso.
Kiddaw ti gobernador iti publiko nga agtitinnulong tapno malabanan iti nasao a variant ket disiplinaan iti bagi ken agtalinaed laeng iti pagtaengan no awan iti napateg a pananan. Nasaysayaat no saan nga agpipinnulapol, agaramat kanayon iti face mask ken face shield ken agkararag iti Namarsua tapno maiyadayo iti peggad kontra iti nasao a virus.
Kiddawna pay iti panangpanunot iti pagsayaatan para iti bagi, pamilia ken ti wagas a maaramid tapno matulongan ti gobierno ken dagiti healthworkers para iti panangkontrol iti kaso iti covid-19 nga agingga ita ket awan pay iti natakwatan nga agas.
