Imbutaktak ni Senator-Judge Panfilo “Ping” M. Lacson ti naawagan a “copy-paste” dagiti programa iti regular a budget pakairamanan ti Confidential and Intelligence Funds (CIF) ti Office of the Vice President (OVP).
Pinasingkedan ni Lacson a kasla “stupid” ti panagramat ti dandani agkakapada a panangiladawan dagiti programa ken physical targets para iti regular a budget ken CIF na daytoy.
Dinakamat ni Lacson dagiti gatad a nakaipalaon iti General Appropriations Act (GAA) para iti 2022 ken 2023 ken inyarig na dagituy iti physical ken financial plans ti OVP para iti CIF.
Basar kadagiti nadakamat a datos, idi 2022 ket nakaawat ti OVP ti P621.6 milyon iti salinong ti GAA ken P125 milyon a CIF para iti fourth quarter ti 2022 para iti “good governance program”.
Inlawlawag ni Lacson a ti panagaramat na ti sarita nga “stupid” ket mangdakdakamat iti agpapada a ladawan ken nomenclature kadagiti PAP, PFP ken physical targets, saan nga iti sinuman a tao.
