Natay iti pammagkong ti maysa a construction worker idiay Barangay Puerta Real, Sto. Domingo, Ilocos Sur.
Nabigbig ti biktima a ni Richard Tulbera Andres, agtawen iti tallopulo ket maysa, agnaed iti nasao a lugar.
Ti met suspek ket ni Jayvee Boy Soriano Quinto, agtawen iti duapulo ket innem, Ebike technician, agnaed iti Barangay Pantay Daya, Vigan City, live-in partner ti kabsat a babai ti biktima.
Iti pannaki-uman ti Bombo Radyo Vigan ken ni Police Captain Joseph Fieldad, agin-inom ti biktima ken suspek iti maymaysa a balay idin ta ti suspek ket napanna sinangat ti biktima iti kuartona gapu iti galad nga impakitana kadagiti annakna, a puon ti nangbagkonganna iti namin-ano a daras.
Nagsagaba ti biktima iti tallo a dunor iti bukotna a naitaray iti ospital ngem saanen a nakalasat.
Naglibas ti suspek kalpasan ti pammagkong ngem nakemmeg babaen iti hot pursuit operation.
