Dead on arrival ti maysa a construction worker idiay Barangay Macaoayan, Burgos, Ilocos Sur gapu iti pannakakorientena.
Nabigbig ti biktima a ni Christopher Domenden Dagdag, agtawen iti duapulo ket pito, agnaed iti nasao a lugar.
Alas kuatro iti malem idi naipakaammo iti Burgos Municipal Police Station ti pannakakoriente ti biktima nga agtrabtrabaho iti construction site.
Iti pannaki-uman ti Bombo Radyo Vigan ken ni PCapt. Allan Reoliquio, mapapati nga ingagara ti biktima nga inigganan ti livewire ta bigat pay laeng ket naibaganan dayta a gandatna kadagiti kaduana ngem saanda laeng a pinati.
Adda ig-igganan ti biktima a landok nga inkabitna iti livewire nga isu ti nakakorienteanna ket naitapuak iti nasurok kumurang uppat a metro.
Ti pannakaitupakna iti daga ti maysa pay a rason no apay a napakaroan ti biktima.
Naitaray iti ospital ti biktima ngem saanen a naispal ti biagna.
