Natay ti maysa a lalaki gapu ti pannakalmesna iti karayan idiay Barangay Lintic, Banayoyo, Ilocos Sur idi kalman, July 19, 2025.
Nabigbig ti biktima a ni Cean Ian Garcia Gadut, agtawen iti duapulo ket maysa, awan ti asawana, construction worker, ken agnaed idiay Barangay Lintic, Banayoyo.
Ti pannaki-uman ti Bombo Radyo Vigan ken ni PCPt. Medward G.Galay ti Banayoyo Municipal Police Station, impakaammo ni Brgy. Kagawad Concuelo Abalos Jr. a taga-Brgy. Lintic, Banayoyo iti pannakalmes ti biktima iti Binnuyog Bridge iti nasao a lugar.
Segun ken ni Galay, maysa kadagiti kadua ti biktima iti nagangaw ket innalana ti tsinelas ti biktima ket impurwakna iti karayan isu a timpuak ti biktima ta impadasna nga innala.
Nagtalek dagiti kakaduana nga ammo ti biktima iti aglangoy isu a saanda a dagus a tinulongan ngem idi nakitadan a naiyanud gapu ti napigsa nga ayos iti karayan ket pinanggepda nga alawen ngem saanda a kinabaelan.
Gapu dayta ket insigida a naisayangkat ti search and rescue operation dagiti otoridad, ket iti alas sais iti malem nasarakan ti biktima nga awan ti puotna idiay Barangay Langlangca 1st, Candon City, Ilocos Sur.
Naipaagas iti Candon City General Hospital, Brgy. Tablac, Candon City, Ilocos Sur ti biktima ngem naideklarar a dead on arrival.
Nagpalagip ni Galay kadagiti umili a liklikan iti agaramid iti nalabes a panaggi-innangaw ta amangan nu isu ti pakaisagmakan.
VIDEO – PCPT. MEDWARD GALAY
