VIGAN CITY – Binallaagan ti Commission on Audit (COA) dagiti local government units (LGUs) a saanda nga usaren dagiti pondo a nairanta para iti programa nga Assistance to Individuals in Crisis Situation (AICS) kadagiti dadduma a proyekto malaksid iti panangsunbat ti kasapulan dagiti pamilia nga adda iti krisis.
Nasken a tungpalen dagiti LGU dagiti probision iti Department of Social Welfare and Development (DSWD) Memorandum Circular No. 16 iti panang-screen kadagiti umawat iti AICS tapno mausar a nasayaat ti pondo.
Iti 2023 annual audit report (AAR) ti COA, nadakamat ti kaso ti ili ti Sinait, Ilocos Sur, mainaig ti panagusarda ti P464,000 nga AICS funds a panangipaay iti food subsidy kadagiti nadumaduma a tattao kas “supplement” para kadagiti barangay a saan a nakaawat iti food allowances manipud iti maysa a politiko iti barangay election idi 2023.
Segun iti COA iti post-audit ti petty cash voucher iti ili ti Sinait, adda uppat a “replenishments” ti petty cash fund a pakairamanan ti panagbayad iti food subsidy kadagiti tattao iti pakabuklan a P464,000 a naikissay manipud AICS program, a naiwaras kadagiti 232 a tattao ti tallo a barangay.
Naamuan dagiti state auditors a ti pannakaipaay ti food subsidy kadagiti tattao kas “supplement” kadagiti barangay a saan a nakaawat iti food allowances manipud iti maysa a politiko idi barangay election ket sinungbatan ti munisipyo a naala manipud iti AICS Program.
Gapu iti daytoy, inyunay-unay ti audit team a dagiti benepisiario ti food subsidy ket saan a kualipikado nga umawat iti programa ti AICS gapu ta saanda a maibilang a persons in crisis situation.
