Nakasaganan ti Commission on Elections (Comelec) ti maisayangkat a proclamation dagiti sangapulo ket dua a nangabak a senador.
Segun ken ni Comelec Chairman George Erwin Garcia matuloyen ita nga aldaw, May 17, 2025 ti nasao a proclamation a maisayangkat iti Tent City ti Manila Hotel iti alas tres iti malem.
Mapalubosan dagiti nangabak a kandidato nga agitugot iti sangapulo agingga sangapulo ket lima a kakaduada.
Tunggal kandidato ket maikkan laeng iti lima a minutos tapno agyaman kadagiti mangsupsuportar kadakuada.
Napatulodanen ti National Board of Canvassers ti formal invitations dagiti sangapulo ket dua a senador.
Maipalagip nga idi Biernes ket iruar ti NBOC iti maawagan a Majic 12 a nangabak a senador a pakairamanan da Christopher Bong Go, Bam Aquino, Ronald Bato dela Rosa, Erwin Tulfo, Kiko Pangilinan, Rodante Marcoleta, Ping Lacson, Tito Sotto III, Pia Cayetano, Camille Villar, Lito Lapid ken Imee Marcos.
Inton May 19 met a maiproklamar dagiti nangabak a Party-list groups.
