Ikonkonsiderar ti Commission on Elections ti panangipablaak online dagiti Statement of Contributions and Expenditures dagiti kandidato, partylist groups, ken political parties tapno mapapigsa ti transparency ken accountability dagiti makipaset iti eleksyon.
Segun ken ni Comelec Chairman George Erwin Garcia, mabalin a mayupload iti website ti Comelec dagiti SOCE iti uneg ti dua a lawas, ngem kasapulan pay ti pammalubos manipud iti Department of Information and Communications Technology para iti maisayangkat a vulnerability assessment ti online platform.
Maibasar iti kaudian a rekord ti Comelec, 24 manipud iti 64 a senatorial candidates, 10 manipud iti 28 political parties ken 64 manipud iti 154 partylist group ti nakaipasan iti bukodda a SOCE.
Binallaagan met ni Garcia dagiti kandidato ken partido a saan a makaipila iti SOCE da iti dua nga agsaruno nga eleksyon ta mabalinda a mapatawan iti perpetual disqualification manipud iti panagtarayda iti ania man a public position, sangwenda ti kaso nga administratibo ken kriminal.
