Nagpanawagan dagiti lider iti industriya ti niyog iti gobierno a nayonan ti pondo tapno mapapigsa ti kabaelan ti sektor a makisabay iti world market ken makasurot iti naing-inget nga international standards.
Kiniddaw ti National Sectoral Committee on Coconut (NSCC) nga ikkan ti Philippine Coconut Authority (PCA) ti naan-anay nga access iti special fund para iti trade ken panangpalawa ti merkado manipod coconut levy fund.
Segun ti NSCC, napateg dayta tapno mapagtalinaed a competitive dagiti produkto a niyog iti pagilian, mapapigsa ti promosyon iti merkado ken masigurado ti panangsurot iti international regulation.
Nakalanad ti Republic Act No. 11524 wenno Coconut Farmers and Industry Trust Fund Act ti pannakaidatag ti napapaut a pondo para iti rehabilitation ken modernisasyon iti industriya iti niyog iti pagilian.
