VIGAN CITY – Maawat latta dagiti coach ken atleta ditoy pagilian ti allowance-da uray no naipasardeng dagiti nadumaduma nga sporting events gapu iti COVID19 kas pinasingkedan ni Philippine Sports Commissioner Celia Kiram.
Segun ken ni Kiram, naanay pay laeng ti PHP 99M nga inlatang ti PAGCOR a pondo tapno maikkanda iti allowance ken inkari ni PSC Chairman William Butch Ramirez nga itedda latta agingga adda pay ti pondo no man pay naipasardeng dagiti operasyon ti POGO nga isu ti pangnamnamaan iti National Sports Development Fund.
Kabayatanna, nabilin amin a National Sports Association nga imonitor-da dagiti atleta ken agtultuloy latta ti panagensayoda ta napateg dayta para kadakuada kas panangisagsagana iti bagida no matuloyton dagiti sporting events a pakisalianda.
Malaksid iti dayta, adda ti sangagasut a milyon a pisos nga inted ni Presidente Rodrigo Duterte para iti qualifying ken panagensayo dagiti atleta iti Olympics ngem gapu ta saan a natuloy ket agtultuloy latta iti panagensayoda ken maipapaay ti kasapulanda.
