Pinasingkedan ni Senador Panfilo Ping Lacson a maipagarup a masapol a nagisayangkat ti Commission on Audit ti naun-uneg a panagsukisok iti panagaramat ti aliases, pakairamanan ti inspeksion iti vault a nangikabilan ti classified information ken iti panag-audit daytoy iti panagaramat ti confidential funds.
Segun ken ni Lacson, nakaipalaon iti Joint Memorandum Circular no. 2015-01 dagiti addang para iti panag-inspeksion iti vault no sadino nakaikabilan ti classified information, pakairamanan ti panang-beripika iti husto a pakabigbigan dagiti tao nga agus-usar ti aliases kadagiti dokumento.
Napateg a maammuan ti COA no sino dagiti husto nga adda iti likudan dagiti alyas a rimmuar iti acknowledgement receipts, kas ken ni “Mary Grace Piattos,” “Patty Ting” ken “Andy Lim.”
Innayon pay ti senador a mabalin nga agusar ti aliases kadagiti dokumento nga adda pakainaigan na iti confidential funds ngem masapul latta nga adda addang tapno maammuan ken ma-verify ti COA ti husto a pakabigbigan dagiti indibidwal a nakapirma iti acknowledgement receipts.
Impunto ni Lacson a masapul nga adda iti uneg ti sealed envelope ti husto a nagan ti tao a nagaramat ti alias ken masapul nga adda perma na daytoy.
