VIGAN CITY – Kiddawen ni Commission on Human Rights Spokesperson Atty. Jacqueline De Guia iti gobierno a rumbeng a patas iti pannakaipakat ti linteg iti amin no man pay maysa nga opisial wenno ordinaryo nga umili tatta a naisakup iti community quarantine ti pagilian.
Iti pannaki-uman ti Bombo Radyo Vigan ken ni De Guia, nainget ti panangbantayda kadagiti siasino man nga aglabsing agsipud ta adda iti maysa a lalaki idiay Cavite a kinabil dagiti pulis gapu iti panaglabsingna iti community quarantine isu a kayatda iti makitinnulong kadagiti maseknan nga ahensia tapno maipaay met la kadakuada ti hustisia.
Kabayatanna, pinasingkedan ti pannakangiwat iti nasao nga ahensia a tatta a tiempo ti krisis ti pagilian ket umaboten ti 495 dagiti COVID-related request ti naawatda a 123 ket dagiti reklamo mainaig kadagiti saan a nakaawat iti tulong a naggapu iti gobierno ken karaman payen iti illegal arrest and detention.
Impalagip ti opisial nga adda iti wayawaya ti tunggal maysa a mangiyebkas ti rikanada ngem rumbeng a masurot latta ti paglintegan ken masigurado nga awan iti mailaklaksid iti bukodda a pagrebbengan.
