VIGAN CITY – Impanamnama ti Commission on Human Rights a maikkan ti seguridad ti pamilia ti biktima a menor de edad a mapapati a rinames ken pinaltugan dagiti dua a pulis idiay Daclapan, Cabugao kagiddan iti panangimbestigarda ti napasamak.
Iti ekslusibo a pannakipatang ti Bombo Radyo Vigan ken Spokesperson Jacqueline De Guia, rumbeng a dagiti pulis ti kangrunaan a mangipasigurado ti seguridad iti tunggal maysa ken kasapulan a natalek latta kadakuada ti publiko isu a dakkel a karit kadakuada tatta no kasano a dalusan ti naganda gapu iti nakainaiganda nga isyu.
Kabayatanna, pinasingkedan ni De Guia a maidanunto iti regional office ti pannakainaig met laeng ti maysa pay a pulis idiay Pangasinan a nangpatay iti masikug a nobyana tapno maimbestigaran ken maipakat kadakuada ti linteg.
Nupay kasta, ingunamgunamna a rumbeng a madusa dagiti nasao a pulis tapno saanen a mapasamak pay iti masangwanan dagiti madi nga inaramidda.
