Burias, naipasngay a maymaysa ti matana

VIGAN CITY – Saan a ninamnama dagiti agassawa a da Nole ken ni Engracia Carasi a taga-Barangay Anonang Menor, Caoayan iti inyanak ti takongda a burias a maymaysa ti matana.

Iti pannaki-uman ti Bombo Radyo Vigan ken ni Engracia Carasi, sipud nayyanak ti burias ket maymaysan ti matana ngem nupay kasta, normal met ti panagkunnotna iti gatas ngem agar-aramatda iti mamador ta saanna a kabaelan ti makilaok kadagiti kakabsatna a sumuso iti inana agsipud ta narigatna pay nga ibalanse ti bagina.

Kunana a damoda laeng a mapadasan ti kastoy nupay sangapulo a tawenen nga agtartarakenda iti baboy isu nga ibilangda met a suerte.

Plano met dagiti akin-taraken nga ipakitanto iti beterinaryo ti daytoy a buriasda ket ita anusanda pay laeng a taraknen.