Nangisayangkat ti reporma ti Bureau of Customs (BOC) iti ahensyada kasaruno ti bilin ni President Ferdinand Marcos Jr. a dalusan ti ahensya manipod iti korapsyon ken isubli ti talek iti publiko.
Segun ken ni Customs Commissioner Ariel Nepomuceno, ti reporma ket nakatutok iti intero nga automation, transparency ken accountability ket gagem a simpaen ti sistema ken mapukaw ti gundaway a maaddaan ti panagabuso.
Kinuna ti opisyal a ti automation ket maysa a dalan nga agturong iti panagbaliw a pakairamanan ti intero nga operasyon ti Customs manipod good declaration ken risk management agingga iti cargo examination, panagbayad ken panagiruar ti kargamento.
Iti salinong dayta ket makissayan ti panagsinnarak a transaksyon ken mapadaras ti serbisyo.
Makatulong pay tapno maliklikan ti pannakadelay ken dagiti riribok ti annayas iti sistema.
Immunan nga imbilin ni Nepomuceno ti temporaryo a suspension ti panagiruar ti Letter of Authority (LOA) para ti inspeksyon dagiti bodega tapno masigurado a maikalintegan ken kasapulan.
