Siguradoen ti Bureau of Jail Management and Penology (BJMP) ti patas a panagtrato iti amin a persons deprived of liberty (PDLs) kasaruno iti pannaka-avail ti nakabalud a government contractor a ni Sarah Discaya ti “e-dalaw” a maysa nga online visitation program iti korapsyon.
Segun ken ni BJMP Spokesperson ken Jail Superintendent Hayrex Bustinera, idi paskua ket saan a pisikal a binisita ni Discaya ti pamiliana no diketdi babaen iti e-dalaw system.
Dagiti laeng abogadona ti direkta nga adda komunikasyonda kenkuana.
Inlawlawag ti BJMP official nga amin a balud ket naka-avail iti isu met laeng a pribilehiyo a nagaramat ti e-dalaw.
Impaganetget pay ni Jail Supt. Bustinera a kapada ti tratoda ken ni Discaya kadagiti dadduma a balud kasaruno ti bilin ni Justice Secretary Jonvic Remulla ken ni BJMP Chief Jail Director Ruel Rivera a mangiparparit iti aniaman a klase ti VIP treatment.
Iti biang ti BJMP ket siguradoenda iti publiko a patas ti panangtratoda iti amin a PDL ken awan ti VIP treatment.
Iti agdama ket nakabalud ni Sarah Discaya iti Lapu-Lapu City Jail Female Dormitory a nakaipasidong ti hurisdiksyon ti BJMP gapu iti kaso a graft ken malversation nga adda pakainaigan ti maanomalya a flood control projects.
