Nalukatanen ti baro a BioGas facility ti Nueva Segovia Consortium of Cooperative idiay NSCC AgriTourism Farmville, Don Alejandro Quirolgico, Caoayan, Ilocos Sur.
Ti BioGas Technology ket nagbalin a posible babaen ti panagbinnulig ti Charoen Pokphand Foods Philippines Corporation manipud Thailand.
Iti pannaki-uman ti Bombo Radyo Vigan ken ni CEO Divina Quemi, ti pannakaipatakder ti nasao a pasilidad ket kas sungbat iti pannakaireklamoda idi kallabes mainaig iti umatibuor a nabangsit nga angot iti pagtaraknan ti baboy.
Ket ita a gundaway, gagemda a saan a madadael ti salun-at dagiti agindeg ken kayatda a maipakita a napasayaatda ti waste management iti nasao a pasilidad.
Namnamaenna a babaen iti daytoy a gannuat ket agtultuloyen ti panagtaraknan ti baboy tapno masigurado ti seguridad iti taraon.
