VIGAN CITY – Umaboten iti 618,151 ti nairehistro para iti National ID agingga iti May 31, 2024, katukad iti 87.56 percent iti pakabuklan a populasyon iti Ilocos Sur.
Iti pannaki-uman ti Bombo Radyo Vigan ken ni Jeanette Marzan, Chief Statistical Specialist ti Philippine Statistics Authority-Ilocos Sur, ti nasao a bilang ket isu dagiti nakaileppasen iti Step 2 a Biometrics ken Demographic Info.
Innayon ni Marzan a nasayaat ken naurnos ti panagparehistroda babaen iti tulong ken suporta dagiti nadumaduma a Local Government Unit kasta payen dagiti public ken private institution.
Adda ti mobile registration nga inisyatibo ti PSA tapno mayasideg ti serbisyoda kadagiti komunidad.
Inallukoy met ti opisial dagiti awan pay laeng iti ID na a mapandan agparehistro ta kasapulan daytoy kadagiti nadumaduma a transaksyon.
