VIGAN CITY – Sangapulo ket dua a migrante ti agtultuloy a maob-obserbaran iti ospital idinto nga umaboten iti limapulo ti natay kadagiti biktima a nasarakan iti uneg ti maysa a trak idiay Mexico.
Iti pannaki-uman ti Bombo Radyo Vigan ken ni Bombo International Correspondent Vhenyse Encarnacion, tubo iti Bayubay Sur, San Vicente nga adda idiay Texas, natay dagiti biktima gapu ti mapapati a pannaka-heat stroke da ta napupokda iti uneg iti trak ken posible nga awan ti taraon ken danum nga ipaunegda.
Dagiti migrante a naggapu kadagiti nadumaduma a lugar idiay South America kas ti Guatemala, Mexico ken Cuba ket pimmanawda iti pagilianda gapu ti parikut ti ekonomia ken ti environmental disaster ket mapanda koma idiay Amerika tapno mangbiruk ti wagas a mangpasyaat iti kasasaad ti biagda.
Iligal ti panagserrekda isu a saanda a nakarkaruaren iti trak a puon ti pannakatay dagiti dadduma a naglugan.
Gapu dayta, nainget ti America kangrunaan ti estado ti Texas a mangiwayat iti border control tapno makita dagiti sumsumrek iti nasao a pagilian ken ma-tsek no adda met laeng husto nga immigration papers-da.
