Pinasingkedan ti Philippine Navy a madanaganda ti panagadu dagiti Chinese Militia Vessels iti Escoda ken Iroquois Reefs iti West Philippine Sea a mabalin a mangpataud iti “miscalculations”.
Nakairekord ti Philippine Navy kalpasan ti triple a bilang dagiti barko ti China kadagiti reef a nakapauneg ti Exclusive Economic Zone (EEZ) ti pagilian.
Segun kenni Philippine Navy Spokesperson for the West Philippine Sea, Rear Admiral Roy Vincent Trinidad, makapadanag ti kellaat nga iyaadu dagiti barko ti China kadagiti nadakamat a reef.
Kasaruno dayta ti pannakaduktal dagiti nadadael a corals a gapuanan ti mapapati a massive harvesting a naaramid.
Maibasar iti rekord nga inruar ti Armed Forces of the Philippines (AFP), dumanonen ti 40 ti bilang dagiti Chinese Maritime Militia Vessels iti Escoda Shoal manipud iti immun-una a sangapulo ket dua, idinto a 17 ti nakita iti Iroquois Reef manipud kadagiti immun-una a dua.
Umaboten iti 163 ti bilang dagiti barko ti China agraman dagiti barko ti Peoples Liberation Army Navy, China Coast Guard, ken Chinese Militia Vessels manipud laeng ti dati a 129.
