VIGAN CITY- Pimmusayen ni Gerardo Reboldela Dar nga agtawen iti tallo pulo ket walo, naasawaan ken agnaed idiay Barangay Danuman East, Sta. Maria a biktima ti pammaltog idi agsapa ti February 27.
Segun ken ni Police Captain Arcadio Viloria, hepe ti Sta. Maria PNP, naitaray idiay Ilocos Sur Provincial Hospital- Gabriela Silang ti biktima ngem idi naiyalis idiay Metro Vigan Cooperative Hospital ket naideklerar a dead on arrival.
Kinuna ni Arcadio, makumikom da nga agur-or iti ad-adu pay nga impormasyon ken ebidensiya iti pannakapapatay ti biktima uray nu addan dagiti sursuruten da nga anggulo ken addan dagiti im-imbestigaran da a person of interest iti pasamak.
Immapela ti hepe kadagiti taga-Sta. Maria a nu adda ammo da inaig iti pasamak ket makikinnammayet da kadagiti pannakabagi ti linteg tapnu maikkan iti hustisya ti pannakatay ti biktima.
