VIGAN CITY – Napadayawan a kas Best Municipal Fire Station ti Bureau of Fire Protection – Narvacan babaen iti panangidaulo ni Fire Senior Inspector Rex Dela Cruz ken ti BFP-Vigan kas Best City Fire Station iti provincial level.
Iti pannaki-uman ti Bombo Radyo Vigan ken ni Dela Cruz, tallo nga ili ti nakabinnalubalda a pakairamanan ti Sta. Lucia, Cervantes ken ti Sta. Catalina ket napagasatanda a napili a mangibagi iti provincial level.
Naragpatda ti nasao a pammadayaw babaen iti panagtitinnulongda ken ti awan sarday a panangisayangkatda kadagiti Fire Prevention Activities kas ti panangiyuswatda ti Fire Safety Inspection kangrunaan kadagiti establisimiento a gapu ti dayta ket bimmasit dagiti nauram manipud idi January agingga tatta a bulan.
Gapu ti dayta, ikagumaanda ti agserbi a nasayaat ta namnamaenda nga inton sumaruno a gundaway ket mapadayawandanton iti regional level.
Kabayatanna, nagkiddaw ti BFP-Narvacan iti Department of the Interior and Local Government iti nayon a firetruck, ambulansya ken dagiti dadduma pay nga alikamen a kasapulanda nga agresponde saan laeng nga iti uram no di ket aniaman a didigra a sumangbay.
