Kinumpirmaran ti Department of Agriculture (DA) nga asidegen nga irusatda ti programa a ‘Benteng Bigas, Meron Na!’ a nairanta a nailatang para kadagiti manursuro ti publiko ken dagiti non-teaching personnel.
Impaganetget ni DA Secretary Francisco Tiu Laurel, Jr. kalpasan ti naballigi a pannakairusat ti PhP20.00 kada kilo a programa ti bagas a damo a nakapokus kadagiti driver ti jeep, tricycle, ken dadduma pay a nangrugi idi kalman, Setyembre 16, 2025.
Maibasar iti plano ti DA, target-da ti aglako iti mapatta-patta a 1,000 a tonelada ti bagas iti inaldaw inton Oktubre ita a tawen babaen ti nasao a PhP20.00 per kilo rice program.
Iti salinong ti nasao a programa, tunggal pamilia ket maaddaan iti gundaway a gumatang iti agingga iti sangapulo a kilo ti bagas iti kada bulan babaen ti Kadiwa ng Pangulo.
Nangilatang ti gobierno iti nayon a PhP10 Bilion iti budget ti 2026 tapno masigurado ti agtultuloy a balligi ken pannakapalawa ti programa, gapu ta ti nasao a pondo ket nairanta a mangsuporta kadagiti operasion ken mangsigurado nga agtultuloy ti pannakapalawa ti programa kadagiti sumaruno a tawen. Augie Arellano
