VIGAN CITY – Nag-courtesy call ti baro a Philippine National Police – Regional Director a ni Police Brig. Gen. Rodolfo Azurin kenni Gov. Ryan Singson, Narvacan Mayor Luis Chavit Singson ken ni Cong. Bonito Singson.
Kalpasan iti dayta ket binisita ti baro a mangidaulo ti PNP Region 1 ti Ilocos Sur Police Provincial Office nga isu met ti gundawayna a nangiyebkas iti panagyamanna.
Segun ken ni Chief Police Community Relations Police Major Marcelo Martinez Jr., pinalagipan ni Azurin dagiti amin a pulis nga agan-anusda nangruna tatta a naisakup iti general community quarantine ket agtultuloy latta ti panangbantayda ti probinsia.
Malaksid iti dayta, inyunay-unayna ti kangrunaan met a gagemna nga isu ti naawagan a “Malasakit, Kaayusan, Kapayapaan at Kaunlaran” para iti intero a rehion.
Ni Azurin ti dati a Director ti Maritime Group idiay Camp Crame ken isuna ti simmukat kenni dati a PNP Regional Director Pol. Brig. Gen. Joel Ordonia a nagretiro idi May 10.
