Adu a Lebanese ti mangnamnama iti abilidad ti baro a Presidente ti Lebanon a ni Army Commander Joseph Aoun a mabaliwanna iti kasasaad ti pagilianda.
Iti pannaki-uman ti Bombo Radyo Vigan ken ni Bombo International News Correspondent Rowena Bagoyo nga adda ita idiay Jounieh, Lebanon, adda latta dagiti dadduma a naladawen ken awanen ti pagbaliwan ti Lebanon ta nailumlom ti pagilianda iti kinarigat ken riribuk.
Segun kenni Bagoyo, inkari ni New-elect President Aoun nga aramidenna ti amin tapno saanen a mapasamak dagiti napalabas a riribuk, ken saan isuna nga agpadiktar ti Grupo a Hezbollah.
Innayon pay ni Bagoyo nga awan iti panagkaykaysa dagiti umili ti Lebanon gapu kadagiti agtultuloy a protesta ken rally nga isaysayangkatda ta kontrada iti panagtugaw ti baro a presidente.
Kabayatanna, adda latta dagiti mapaspasamak a panagbettak idiay South Lebanon, ken agtultuloy ti repatriation dagiti Pilipino.
Madanagan ni Bagoyo iti kasasaad dagiti Pilipino nga adda kadagiti evacuation shelters a saan a makaaw-awat ti usto a tulong, isu a nagpanawagan ti tulong manipud iti Department of Migrant Workers tapno maaksyonan a dagus ti sitwasyon.
