--Ads--
Saan a bumaba iti 139 a tattao, agraman ti 15 nga ubing ti natay kalpasan a limned ti maysa a bangka a nangilugan kadagiti nasurok 300 a pasahero iti kabaybayan ti Djibouti, segun iti International Organization for Migration (IOM) ti United Nations.
Napasamak ti insidente iti kabaybayan ti Aden kabayatan ti panagturong dagiti pasahero idiay Yemen manipud Djibouti iti Huebes ti rabii ken Biernes iti parbangon.
Nasurok 80 a tattao, a kaadduan ket agindeg ti Ethiopia, ti naisalakan, idinto nga agtultuloy a masapsapul ti 84 a mapukpukaw.
