Inallukoy ni Rep. Ace Barbers dagiti opisial ti national security nga imbestigaran no gungundawayan ti China ti saan a pagkikinnaawatan iti pulitika ti Pilipinas kadagiti panawen ti impeachment trial ni Vice President Sara Duterte ken dagiti tension iti West Philippine Sea.
Segun ken ni Barbers, masapul a maammuan no nairana laeng iti timing ti China kadagiti aramidda wenno paset daytoy ti estratehiya a gandatna a pakapsuten ti pannagkaykaysa dagiti Pilipino.
Ngem kinunana a rumbeng a nakabase iti maited nga impormasyon iti mapangnamnamaan ken mapagtalkan a source ken na-verify ti ebidensia ti aniaman a panagsukisok.
Impaganetget ni Barbers nga saan a rumbeng a gundawayan ti sabali a pagilian ti lokal a napolitikaan a panagduduma tapno maparang-ay ti bukod nga interes.
Inawaganna pay dagiti Pilipino nga agtalinaed a nasiput kadagiti posible a pannakibiang dagiti ganggannaet ken agkaykaysa iti panangidepensa iti soberania ken nasional nga interes ti Pilipinas.
~Bombo KLeo
