Pinasingkedan ni Deputy Speaker ken La Union rep Paolo Ortega a posible a sukisoken ti House of Representatives ti bank records ni Bise Presidente Sara Duterte kas paset ti impeachment proceeding ken tapno mapaneknekan dagiti alegasion ti ‘unexplained wealth’.
Segun ken ni Ortega, ti alegasion iti maika-uppat nga impeachment ket naka-sentro iti baknang ni VP Sara a saan a nairaman iti Statement of Assets, Liabilities and Networth (SALN) na isu a nasken a makita ti bank records na kasta met dagiti sanikua na.
Ti maika-uppat nga impeachment ket impila ni Atty. Nathaniel Cabrera ket nakaipalaon iti reklamo a kidkiddawen na nga agirruar ti Kamara ti subpoena iti bank records ni Duterte a sakop manipud 2019 agingga 2025, nasken a maki-koordinar iti Commission on Audit (CoA), Bureau of Internal Revenue (BIR) at Anti-Money Laundering Council (AMLC).
Impaganetget ni Ortega nga adda constitutional investigatory powers ti Kamara a nasken nga usaren da.
