Pimmaspas ti panagregta iti panagpautang dagiti bangko idi Pebrero a mangipasimudaag nga agtaltalinaed a natibker iti credit demand manipod kadagiti negosyo ken pagtaengan iti baet iti maipatpatungpal a peggad manipod iti ruar ti pagilian.
Maibasar iti kaudian a listaan ti Bangko Sentral ng Pilipinas (BSP), umabot iti 9.5% ti year-on-year growth iti pakabuklan nga utang dagiti universal ken commercial bank idi Pebrero, nangatngato bassit no yarig iti 9.3% idi Enero.
Ti pakabuklan a gatad dagiti pautang ket umabot iti P14.27 trillion idi Pebrero a nangatngato iti P1.24 trillion manipod P13.03 trillion iti isu met la a panawen idi napalabas a tawen.
Dagiti pautang kadagiti residente a mangbukbukel iti dakkel a paset iti panagpautang kadagiti bangko ket rimmegta iti 10.1% year-on-year idi Pebrero a napaspaspas ngem iti 9.9% idi Enero.
Kabayatanna, agtultuloy met a bimmaba dagiti pautang kadagiti saan a residente a bimmassit iti 13.2% a nangat-ngato ngem iti 10.4% a panagbaba idi Enero.
