VIGAN CITY- Adu a parikot iti sangwen ti Bangsamoro Transition Authority (BTA) iti panangbukel ken panangmanehar da ti Bangsamoro Autonomous Region in Muslim Mindanao (BARMM) nga isu iti mangsukat iti agdama nga Autonomous Region in Muslim Mindanao (ARMM).
Ti eksklusibo nga interview ti Bombo Radyo Vigan ken ni Amina Rasul Bernardo, mangidaulo ti Philippine Center for Islam and Democracy, naibaga na a dagiti parikot iti dati nga autonomous region ket isu met laeng dagiti parikot a mapasaran ti BARMM wennu posible a manayunan pay ta uray nu addan iti baro a regional government ket saan na kayat a sawen a kabaelan nan a punasen dagiti amin a parikot idiay Mindanao region.
Innayon na a kaaduan kadagiti miyembro ti BTA ket miyembro ti Moro Islamic ken Moro National Liberation Front a saan a sigud a kadua iti gobyerno ken kaaduan ket saan a nairuwam a mangimanehar iti maysa a gobyerno isu a masapul iti panagtitinnulong ti amin tapnu agballigi ti baro a regional government a posible a mangiruwangan iti nabayagen a kalkalikaguman a kappia, linak ken talna, saan laeng nga idiay Mindanao ngem iti intero a pagilian.
