VIGAN CITY – Maysa a saan a nabigbig a lalaki ti nasarakan a natay a nagsagaba iti gunshot wound iti nadumaduma a paset ti bagina iti Diversion Road idiay Barangay Cabalangegan, Vigan City itay11:40AM (August 7, 2024).
Iti pannaki-uman ti Bombo Radyo Vigan ken ni PLt. Col. Reynaldo Mendoza Jr. nga Officer-in-Charge iti Vigan City Police Station, impakaammo dagiti dua a lallaki a concerned citizen iti pannakasarakda iti bangkay a lamulamo.
Segun ken ni Mendoza, nupay naabungan iti rupa ti bangkay ket ammon a dagus dagiti dua a tao ti nasarakanda isu nga insigidada nga impakaammo kadagiti otoridad.
Kinuna ni Mendoza a nagsagaba iti sangapulo ket maysa a gunshot wound ti biktima ngem saan pay nga ammo nu ania ti entrance ken exit dagiti tamana.
Mapapati nga itay pay laeng parbangon a natay ti biktima kas maibasar ti eksaminasyon ti doctor.
Naamoan a 5’2 ti katayag ti lalaki, fair complexion, adda tattoo a letter L iti akin-kannigid a takyagna, ken adda gold necklace nga inaramatna.
Nupay kasta, patienda a saan a takaw ti motibo ti pammapatay ta saan a naala ti mapapati a gold a nakasuot iti biktima.
Naipanen ti bangkay iti Holy Angel Gabriel Funeral Homes para ti pannaka-istimarna ket panawagan ti kapulisan kadagiti adda kameng ti pamiliana a mapukpukaw a mapan kitaen ti bangkay amangan nu isun ti sapsapulenda.
VIDEO – PLT. COL. REYNALDO MENDOZA JR.
