Nakasagana ti pamilia ti maysa a lalaki a nasarakan a natay iti pagnanaedanna a pagtaengan idiay Barangay San Pedro, Narvacan a maidalan ti bangkayna iti autopsy tapno maamuan no adda foul play ti pannakatayna.
Iti pannaki-uman ti Bombo Radyo Vigan iti kabsat ti biktima a ni Reynalyn Callejo Buenafe, agingga ita ket burburtia pay laeng no ania ti napasamak iti kabsatda ta nasingpet ken awan met ti ammoda a nakaririna.
Atapenda a naaramat dagiti natangken a banag iti pannakapapatay ti biktima gapu iti nakaro a panaglitem ti rupana ken dadduma pay a paset ti bagina.
Ngem segun kadagiti pannakabagi ti linteg, saan nga aramid daytoy ti tao ta posible a kagat ti insekto.
Maipalagip a ni Callejo ket nasarakan ti kabsatna a nakapakleb ken nakaro ti dunor a sinagrap ti rupana iti pagnanaedanna a pagtaengan iti nasao a barangay.
