VIGAN CITY – Sinuspenso ti Office of the Ombudsman ni Bamban, Tarlac Mayor Alice Guo ken dua pay a kakaduana iti innem a bulan.
Ti addang ket kalpasan nga impila ti Department of the Interior and Local Government ti graft complaints kontra ken ni Guo inaig ti naireport a pannakainaigna ti na-raid a Philippine Offshore Gaming Operator iti ilina.
Segun ti DILG, ti reklamo ket naipila iti Office of the Ombudsman idi May 24, 2024 ken nagtaud gapu ti issuance ti permit ti Hongsheng Gaming Technology Inc. uray napaayda a nangkompleto ti requirements ken kaadda ti expired a lisensya manipod Philippine Amusement and Gaming Corp. wenno PAGCOR.
Idi March 13 ket rinaid dagiti otoridad ti 10-hectare area nga iop-operate ti Zun Yuan Technology Inc. ken nasarakanda ti dadduma a devices a mainanaig iti POGO operations. Nasurok innem a gasut a Pilipino ken gangannaet ti narescue bayat ti raid.
