Inallukoy ni Senador Bam Aquino ti Department of Education nga i-download ti pondo para iti panagipatakder kadagiti klasrum iti local government unit iti kabiitan a panawen tapno marugyan nga insigida ti pannakaipatakderna.
Segun ken ni Aquino, napateg a mai-download a dagus ti pondo tapno marugianen ti target a pannakaipatakder ti 25,000 a klasrum babaen iti P65 billion iti salinong ti 2026 national budget.
Kas chairperson ti Committee on Basic Education, induron ni Aquino ti panagpangato ti badyet para iti pannakaipatakder ti klasrum iti 2026 national budget kas wagas tapno mapunwan ti 165,000 a classroom backlog.
Iti salinong ti 2026 national budget, naikkan ti DepEd ti turay para iti pannakaipatakder ti klasrum, agraman ti pannakitinnulongda kadagiti LGU, civil society organization, ken non-governmental organization a napaneknekan ti track record-na.
