Maysa a baket ti nasarakan a natay iti Sucoc river, idiay Barangay Calay-ab, Sto. Domingo, Ilocos Sur.
Ti biktima ket agtawen iti innem a pulo ket uppat, naasawaan, residente ti Barangay Guimod Sur, San Juan.
Iti pannakiuamn ti Bombo Radyo Vigan ken ni PLT Victorino Baquirin ti Sto. Domingo Municipal Police Station, adda maysa a mangngalap ti napan nagpakan iti taraken na nga ikan iti nadakamat a Karayan ket dituy nasarakan na ti biktima a tumtumpaw.
Dagus nga impakaammo ti mangngalap iti kapitan da ket isu ti nangipakaammo kadagiti maseknan nga otoridad.
Nagtitinnulong dagiti kameng ti PNP, BFP ken RHU personnel tapno maibangkag ti biktima ngem indeklarar ti duty nurse a pimmusayen ti baket.
Kinumpirmaran iti anak ti biktima nga ti nasarakan a bangkay ket isuna ti ina na nga immuna a nai-report a mapukpukaw idi September 22, 2026.
Nagkedked metten iti pamilia ti biktima a maidalan ti autopsy ti bangkay tapno maammuan no ania ti rason ti pannakatay ti baket ken no adda ti napasamak a foul play.
