VIGAN CITY – Pimmigsa ni Bagyo Sarah kalpasan a nagbalin a Severe Tropical Storm ngem saanen nga aglandfall ta sabalin iti tur-turungen na a direksyon.
Maibasar iti kaudian a severe weather bulletin ti PAGASA, naudi a nasaripatpatan iti bagyo iti kaadayo nga uppat a gasut dua pulo ket lima a kilometro, daya- amyanan a daya ti Aparri, Cagayan wennu uppat a gasut ket tallo pulo a kilometro, daya ti Basco, Batanes a ti kapigsa iti angin na ket umabot ti siyam a pulo ket lima a kilometro tunggal oras agingga a pumigsa ti sangagasut sangapulo ket lima a kilometro tunggal oras.
Agpapa-amyanan- amyanan a laud ti bagyo iti kabuntog a dua pulo ket lima a kilometro tunggal oras.
Nu man pay sabalin iti direksyon a turturungen ti bagyo, umas-asideg pay laeng idiay Batanes ken Babuyan Islands isu a naibayog iti Tropical Cyclone Warning Signal Number 1 dagiti nasao a lugar.
Kabayatanna, ti low pressure area a dati a Bagyo Ramon ket naudi a nasaripatpatan idiay Capas, Tarlac a mangitunda latta ti nakapsot agingga kalalaingan na a tudo kadagiti sumagmamano a lugar ditoy pagilian tatta nga aldaw.
