Babai nga agtawen iti sangapulo ket siam, nasarakan a natay iti septic tank

Maysa a babai nga agtawen iti sangapulo ket siam ti nasarakan a natay iti matartarimaan a pagtaengan idiay Barangay Tinaan, Sta. Maria, Ilocos Sur.

Nabigbig ti babai a ni Diane Candy Divina Adriatico, agnaed iti nasao a lugar, 1^ST year student ti University of the Ilocos Philippines (Ilocos Sur Polytechnic State College).

Iti inisyal nga imbestigasyon, naginom ni Adriatico ken dagiti gayyemna ket iti alas dyes bainte iti rabii, mapapati a natinnag iti septic tank iti lugar.

Dagus a nakikammayet ti Sta. Maria Police Station iti City Forensic Unit para iti pannakaiproseso ti nakapasamakan ti insidente.

Agtultuloy ti imbestigasyon dagiti pannakabagi ti linteg mainaig iti pannakatay ti balasang.